100 ka bangka gipanghatag

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Mihimo pag panghatag og mga bangka sa dakbayan ang tag iya sa Bench nga si Ben Chan uban ni kongresista Lucy Torres Gomez ug kapikas Richard Gomez diin mitambong usab ang pipila ka mga konsehales ning dakbayan uban ni Bise Mayor Toto Locsin Jr.

Base sa talaan, 100 ka mga fiber glass nga bangka nga dunay tagsa tagsa ka makina ang gipang apud apud ug gipangplastar didto sa pier sa barangay Ipil nga gipundokan sa mga nakadawat taliwala sa grabe nga kainit.

Suma pa sa kongresista nga mao na kini ang ika unom nga higayon nga nihimo sila pagpanghatag og bangka sa mga lehitimo nga mga mananagat ning dakbayan kinsang mga pangan ang nalatid sa Bureau of Fisheries and Aquatic Resources (BFAR).

Dugang pa nga ilang gipaagi og bunot-bunot ang mga pangan sa nakadawat hinungdan nga gikan sa managlahing barangay ang mga nakadawat sa 100 ka mga bangka.

Miangkon naman ang kongresista nga di nila maato paghatag ang tanang mananagat gumikan sa ka limitado sa mga bangka apan iyang gisiguro nga di kini maoy katapusang higayon sa pagpanghatag tungod kay padayon pa sila nga mangita og donor sama sa Bench.

Base sa datos gikan sa BFAR, mikabat sa 6,200 ka mga mananagat lukop kwatro distrito sa Leyte ang nawad-an og panginabuhian human sa pagkuso kuso sa bagyong Yolanda.

Gikalipay naman sa kongresista sa dihang iyang nakita ang una nilang gipanghatag nga bangka nga gigamit na sa pagpanguha og isda.

Suma pa sa kongresista nga nadasig siya pagsamot sa pagpangita og mga donor nunot sa iyang nakita.

Subli naman nga gipamahayag sa kongresista nga bisan og walay Priority Development Assistance Fund (PDAF) di kini rason aron mahunong siya sa pagtabang.

Nag binayloay naman og pasalamat ang kongresista ug si Chan atubangan sa katawhan tungod sa pagtabang niini sa dakbayan ug sa distrito ug misaad naman si Chan nga motabang kutob sa ilang makaya.