Supplemental budget sa executive, aprobado na

By: John Kevin D. Pilapil
July 29, 2014
DyAJ Power 90.3 FM News Correspondent

ORMOC CITY- Giaprobahan na sa konseho ning dakbayan ang hangyo nga 25.7 milyones nga supplemental budget sa executive department alang sa ilang pag hire og 320 ka mga casual employees gikan sa buwan sa Agusto hantud Disyembre ning tuiga. 

Mga konsehales nga nibotar pabor sa hangyo gihatagan sa kahigayunan nga makapadayag sa ilang pag uyon.

Mahinumdoman nga nahurot ang gigahin nga budget sa 120 ka mga casual sa executive sa tibuok tuig nunot sa pagpasaka og kapin 300 human sa bagyong Yolanda partikulamente niadtong buwan sa Marso kung diin gisugdan ang hiring, kini base sa datos gikan sa City Human Resources office.

Sa gihimong budget hearing, nidepensa ang executive nga, dunay dako nga panginahanglan og tawo ang kagamhanan human sa bagyo hinungdan sa pagdugang og kawani inay 120.

Sa pagtong tong sa buwan sa Hulyo nahimong job order ang kapin 300 nga casual sa executive department butang nga gikalro ni city councilor Vince Rama nga dili ang konseho ang hinungdan kung nganong na Job order ang mga casual.

"Request na sa executive ug kami sa konseho igo lang mi ni approve sa ilang request, dili kami naghimo nila nga j.o" matod ni Rama.

Ang 25.7 milyones nga supplemental budget gikuha gikan sa savings sa kapin gatus ka mga bakanteng posisyon sa regular nga kawani gikan sa buwan sa Enero hantud Hunyo ning tuiga.

Mapasalamaton ang mga kawani sa maong kalambuan apan kulbahinam pa alang kanila kung kinsa kaha ang ma renew ug dili na.