Sunod sunod nga kawat sa AOR sa station 2 maka alarma na: Magamay

By: John Kevin D. Pilapil
July 29, 2014
DyAJ Power 90.3 FM News Correspondent

ORMOC CITY- Naalrama na karon ang kapulisan sa police station 2 niining sunod sunod nga kawat nga nahitabo sa pipila ka barangay nga sakop sa ilang area of responsibility (AOR).

Suma pa ni PInsp. Bernidie Magamay, hepe sa ormoc city police station 2 nga halos pito na ka insidente sa malampusong pagpangawat ang nahitabo sa ilang aor sud ning buwana.

Si Magamay nabalaka kung di dayun kini nila masumpo nga panghitabo sa ilang aor hilabi na kay kuwang sila sa mobility sa ilang estasyon.

Gibutyag ni Magamay nga niduol siya kang city councilor Vince Rama kinsa chairman sa committee on police, fire and penology ug bise mayor Toto Locsin Jr aron ihangyo ang pagbutang sa ilang estasyon og usa ka sakyanan nga ilang magamit sa pag roving.

Si Magamay niingon nga usa sa ilang gisaligan karon mao ang mga barangay tanod nga maoy gikonsiderar nga first responder kung may mga panghitabo sa ilang barangay.

Sa milabayang gabie, tulo ka wa mailhing mga taw, dunay batan-on ug pulos naka itom ang nakit-an sa mga nag roving nga mga barangay tanod sa barangay Cadauhan nga maoy gituhoang responsable sa mga nahitabong kawat sa lugar diin niadtong gabhiona panimalay sa usa ka Joel Ralos ang gisaka ug gisakiyo ang duha ka tablet.

Usa sa nakabalaka kang Magamay ang report nga armado ang mga kawatan ug andam mopatay kung dunay mopalag kini kahuman gipusil sa usa sa tulo ka wa mailhing taw ang mga tanod nga misita kanila.

Posibli nga kalibre 45 ang gigamit sa kawatan suma pa ni Magamay nga nagpaabot sa resulta sa crime lab nga ni determinar kung unsa gyud nga kalibre ang gigamit.

Ngit ngit usab ang sagad sa mga karsada tungod kay way mga lamp post hinungdan nga di dayon basta basta maka gukod.

Nakadawat na usab og report si Magamay nga dili taga Ormoc ang responsable sa pagpangawat kay may mga residente sa pipila ka barangay ang nisugilon nga may nasigpatan silang mga taw nga di nila kaila nga naa sa ilang barangay mag istambay butang mga padayon pa nila karong gi imbestigar.

Kwarta, mga mahalon nga butang kini maoy sagad nga nakuha sa kawatan ug sagad nga oras ang tirada mao ang alas 12 sa tungang gabie hantud sa kadlawon.

Ang police station 2 naa nahimutang sa barangay Valencia utlanan sa Ormoc ug lungsod sa Kananga Leyte.