Water reservoir hapit usa ka tuig wa magamit

By: John Kevin D. Pilapil
DYAJ Power 90.3 FM News Correspondent

ORMOC CITY- Mipiyait karon ang mga residente sa Purok 5 ug 6 sa Barangay Alta Vista ning dakbayan kay hapit usa ka tuig na nga wa pa sila makapahimulos sa bag-ong gitukod nga water reservoir sa Ormoc Waterworks Systems Administration (ORWASA).

Ang naasoyng mga purok gilangkuban sa 500 ka panimalay nga maoy maka benipisyo sa maong reservoir.

Ang maong reservoir adunay contract amount nga P2.9 milyones nga gisugdan niadtong Marso 2013 ug nahuman kini sa Agosto sa samang tuig, apan hantud karon wa pa kini magamit sa gatusan ka mga residente.

Suma ni Engr. Manny Borela sa ORWASA, nga nalangay ang pag testing sa maong reservoir gumikan kay walay supply sa kuryente ug may kuwang pa nga pisa aron mapundohan na og tubig nga gikan sa Ahag.

Matod ni barangay captain Myrna Mangle nga, mi pirma nalang siya og acceptance sa maong proyekto bisan pa man og wa pa kini ma testingi butang nga gi kwestyon karon sa mga residente.

"naa man gihapoy hold ana kay naa man silay (contractor) mga P400.000 siguro to nga retention unless ma testingan na" suma ni Mangle.

Sayo ning buwan, gi testingan na pagpaundo sa ORWASA og tubig ang maong reservoir apan way swerte kay dunay leak hinungdan nga nagpalit na usab og materyales ang contractor niini aron sa paghimuong retrofitting.

"nagpalit na sila (contractor) og materyales for retrofitting, gamitan na nato karon og epoxy special kay sa una parlastic raman to ato gigamit" matod ni Engr. Gerry Germano, labaw sa ORWASA.

Bisan og masulbad na ang leaking, di pa gihapon sigurado si Germano nga ma suplayan na ang gatusan ka mga panimalay kay may problema pa sa yuta nga agian sa mga pipe.

"naa na hinuon siyay pipe nga nag konektar sa old reservoir padung sa new reservoir, naa na giagi sa main road, pero ang para sa kabalayan di pata ka kuan kay wa pa man gud na ma donate ang yuta nga maagian sa mga pipe" dugang ni Germano.

Ang pagbutang og bag-ong reservoir usa sa nakitang sulosyon sa kagamhanan aron di dayon mahutdan og supply ang kabalayan sa Alta Vista ug lakip na sa Carlotta Hills.

Masaligon naman si Germano nga masulbad dayun kini nga problema sa reservoir ug way dapat kabalak-an.