DUTY SA KADLAWON

ORMOC CITY- Posibli nga duna nay duty ang mga traffic enforcers inig ka kadlawon, kini kung maaprobahan na ang special detail nga himuon sa Traffic Management Section (TMS) ning dakbayan tungod sa padayong pagpanakop sa gatusan ka mga kulorom nga traysikol.

Matod sa labaw sa TMS nga si P/Sinsp. Orlando Viacrusis nga ilang na obserbaran nga matag lawom nga gabie ngadto sa kadlawon mang gawas ang mga kulorom nga trasyikol.

"body body nalang sila pero duna silay pulis nga kauban inig duty" matod ni Viacrusis.

Ang maong pagpanakop gisugdan kahuman mipagawas og listahan ang City Business Permit and Licensing office (CBPLO) ning dakbayan niadtong mga body number sa mga traysikol nga way mayor's permit ug wa mo renew sa prangkisa.

PHOTO: Nagpunsisok ang mga traysikol sa dakbayan sa Ormoc. JKDP

Niini, gitapok ni Viacrusis ang tanang mga enforcer sa dakbayan aron kini ipahibaw.

Busa gihatagan og otoridad ang mga enforcers sa pagpanakop niadtong mga kulorom nga traysikol diin ang mga enforcers sa kadalanan dunay kopya sa mga body number nga naa sa listahan gikan sa BPLO.

Sa paghimo ning balita, wa pay ideya si Viacrusis kung pila na ka traysikol ang nadakpan ug na impound ngadto sa motor pool sa General Service Department (GSD)

Base sa listahan anaa sa kapin 60 ka traysikol nga wala ma renew ang prangkisa samtang kapin 200 naman ang walay mayor's permit.

Sa unang adlaw sa pagpanakop, gibutyag sa usa ka enforcer nga dunay ubang driver nga mi sibat sa dihang ila na untang dakpon.

May ginukdanay pa nga nahitabo apan pakyas ang enforcer sa pagdakop sa traysikol.

Ang Ormoc dunay 52 ka mga traffic enforcers.

By: John Kevin D. Pilapil/ Power 90.3 FM News Correspondent