Wednesday, August 13, 2014

EXCLUSIVE REPORT: 6 ka kawani sa LGU positibo sa drug test

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Gipaubos sa surprise drug test ang 20 ka mga kawani sa lokal nga kagamhanan ning dakbayan sa milabayng semana.

Sa 20 ka mga kawani nga gi drug test, 14 niini ang negatibo ang resulta samtang 6 ang giingong positibo.

Giingong dad-on pa sa kaulohan ang papel ug ang ihi sa unom ka giingong nag positibo alang sa pagahimuong confirmatory test.

"Dili pa ta makahatag og result gyod sa concerned agency kay subject for confirmatory pa man ang unom nga suspected, basta karon out of 20, 14 ang negative" matod ni Butch sa Mejia Drug Testing center.

Dugang pa niya nga mokabat sa 15 working days ang proseso sa confirmatory test sa una pa nila madawat ang resulta.

Nagdumili naman sa paghatag sa mga pangan sa unom ka giingong nag positibo sa drug test ang drug testing center gumikan sa confidentiality.

Matod ni Adelaida Biaculo, labaw sa Human Resources office nga sa 20 ka kawani, 5 niini ang casual ug 15 ang regular.

Nasayran nga gipaagi sa raffle ang mga pangan sa kawani human sa flag raising ceremony.

Ang labing unang drug testing sa administrasyon ni mayor Edward Codilla maoy sanong sa tinguha nga dapat walay adik nga kawani nga mag trabaho.

Si Biaculo midugang nga, duna pay mo sunod nga surprise drug test human niini.

Gikataho nga ang mapamatud-an nga adik, ipaabot sa disciplinary action committee pinangulohan ni city administrator Francis Pepito.

Asawa sa konsehal ug pulis sakpan sa pension house

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Nagpamaak sa kalagot ang konsehal sa lungsod sa San Miguel Leyte kahuman maaktohi ang iyang 30 anyos nga asawa nga dunay kaubang pulis sud sa usa ka kwarto sa pension house sa barangay Campetik, lungsod sa Palo nga pulos hubo.

Ang konsehal nga nag eskwela sa usa ka law school ang nangayog tabang sa iyang classmate nga pulis nga nadestino sa Regional Intelligence Division (RID) 8 aron panid-an ang iyang asawa nga iyang gidudahang niduwa og laing team.

Nasayran nga niadto pang Pebrero gipanid-an ang maong babay ug niadtong alas 9:20 sa milabayng gabie nakompirmar sa RID ang pagduda sa bana sa dihang nakit-an iyang asawa nga misud sa pension house uban sa pulis nga nadestino sa Tacloban.

Si P/Sinsp. Elvis Angayangay, hepe sa Northern Leyte-CIDG niingon nga, nangayo kanila og tabang ang RID alang sa pagahimuong operasyon ngadto sa pension house.

Samtang diha pa sa gawas ang mga operatiba, nabatian na sa kapulisan nga gikasa na sa pulis nga naa sud sa kwarto ang iyang pistola busa dali dayun nga gisud sa mga operatiba ang kwarto uban sa konsehal.

Nisugat sa mga mata sa operatiba ug sa konsehal ang ang iyang asawa ug ang pulis nga pulos wa nay sapot.

"suko kaayo ang iya bana ui, ingon ana gyod kuno na iyang asawa mura bag nagkati" matod ni Angayangay.

Giingong pulos gikan sa trabaho ang duha sa una pa nisud sa pension house kay pulos pa kini nag uniform.

Nihimo usab pagsukol ang pulis sa mga operatiba diin gihapak sa iyang armas ang usa ka sakop sa CIDG ug nakaangkon og samad ug naputos sa dugo ang sinina.

Nakuha sa mga operatiba ang mga gamit sa pulis sama sa 9mm nga pistola, 1 ka magazine nga dunay 12 ka buhing bala ug ang PNP I.D.

Si Angayangay niingon nga mopasaka sila og kaso sa pulis tungod sa pagsukol sa otoridad, nag atubang usab og kasong adultery ang maong pulis ug ang asawa sa konsehal.

100 ka bangka gipanghatag

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Mihimo pag panghatag og mga bangka sa dakbayan ang tag iya sa Bench nga si Ben Chan uban ni kongresista Lucy Torres Gomez ug kapikas Richard Gomez diin mitambong usab ang pipila ka mga konsehales ning dakbayan uban ni Bise Mayor Toto Locsin Jr.

Base sa talaan, 100 ka mga fiber glass nga bangka nga dunay tagsa tagsa ka makina ang gipang apud apud ug gipangplastar didto sa pier sa barangay Ipil nga gipundokan sa mga nakadawat taliwala sa grabe nga kainit.

Suma pa sa kongresista nga mao na kini ang ika unom nga higayon nga nihimo sila pagpanghatag og bangka sa mga lehitimo nga mga mananagat ning dakbayan kinsang mga pangan ang nalatid sa Bureau of Fisheries and Aquatic Resources (BFAR).

Dugang pa nga ilang gipaagi og bunot-bunot ang mga pangan sa nakadawat hinungdan nga gikan sa managlahing barangay ang mga nakadawat sa 100 ka mga bangka.




Miangkon naman ang kongresista nga di nila maato paghatag ang tanang mananagat gumikan sa ka limitado sa mga bangka apan iyang gisiguro nga di kini maoy katapusang higayon sa pagpanghatag tungod kay padayon pa sila nga mangita og donor sama sa Bench.

Base sa datos gikan sa BFAR, mikabat sa 6,200 ka mga mananagat lukop kwatro distrito sa Leyte ang nawad-an og panginabuhian human sa pagkuso kuso sa bagyong Yolanda.

Gikalipay naman sa kongresista sa dihang iyang nakita ang una nilang gipanghatag nga bangka nga gigamit na sa pagpanguha og isda.

Suma pa sa kongresista nga nadasig siya pagsamot sa pagpangita og mga donor nunot sa iyang nakita.

Subli naman nga gipamahayag sa kongresista nga bisan og walay Priority Development Assistance Fund (PDAF) di kini rason aron mahunong siya sa pagtabang.

Nag binayloay naman og pasalamat ang kongresista ug si Chan atubangan sa katawhan tungod sa pagtabang niini sa dakbayan ug sa distrito ug misaad naman si Chan nga motabang kutob sa ilang makaya.

Naghikog atubangan sa iyang anak

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Lalaki nga gikan nitambong sa usa ka birthday party ang napalgan nga nagbitay nga wa nay kinabuhi sa iyang panimalay niadtong milabyng adlaw.

Ang biktima giila nga si Danilo Justo Jr., 24, residente sa Sitio Utod, Barangay Libertad ning dakbayan kinsa migamit og pisi nga gihikot sa liog atubangan sa 3 anyos nga anak.

Sa inisyal nga imbestigasyon, nahibaw an nga alas 4:00 sa hapon samtang naa pa sa party, nananghid ang biktima sa iyang kapuyo nga moadto sa iyang ginikanan sa Barangay Margen aron mangayo og kwarta.

Nahibaw-an nga gibalibaran sa iyang ginikanan ang ilang anak kay wa sab silay kwarto niadtong tungora apan gikasuko hinuon kini sa anak.

Ni desisyon ang anak nga mopauli nalang sa Libertad nga dunay kasuko sa iyang ginikanan, apan kay nakainom gipugngan kini sa amahan nga di pamanehuon sa motorsiklo kay medyo nakinom na.

Inay maminaw sa tambag, gikasuko pa usab sa biktima ang tambag sa amahan hinungdan nga nanghagit kini og sinumbagay.

Gitamparos sa amahan ang anak ug gisukmag kini tungod sa pagka arogante ug pagpakita og ka walay respito kaniya.

Mipauli pag lahos ang biktima sa iyang panimalay ug alas 6 sa gabie giadto kini sa amahan sa kapuyo.

Samtang padung pa lang sa balay, nabati sa amahan sa kapuyo ang bata nga nikatawa apan nakurat kini sa dihang iyang nakita ang biktima nga nagbitay na.

"Nag sige ra baya jud gihapon og duwa ang bata unya iyang papa nagbitay na" matod sa kapulisan nga nirespondi.

Ang amahan sa biktima wa masayud kung unsay tinubdan sa paghikog apan dunay higayon nga nisugilon ang biktima nga dunay problema sa pagpuyo.

Wa naman makasabot sa iyang gibati ang inahan sa biktima diin tulala kini samtang gisandig iyang ulo sa haligi sa stasyon sa kapulisan.

Wa naman mo kuyog sa kabanay sa biktima ang kapuyo niini didto sa stasyon.

Nahibaw-an nga maka tulo na kahigayon nga nisuway paghikog ang biktima apan napugngan kini.

Wa namay nakitang foul play ang kapulisan sa kamatayon sa biktima.

Asa ang sobra: Konseho

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Gipangita karon sa konseho ning dakbayan ang hapit 8 mil pesos nga sobra sa 4.5 million nga budget nga gigahin alang sa tag 1,500 nga cash gift sa matag senior citizen nga nagsaulog sa ilang adlawng natawhan gikan sa Enero hantud sa Mayo ning tuiga.

Base sa datos sa Office of the Senior Citizens Affairs nga, mikabat sa 2,468 ka mga senior citizens ang nahatagan sa tag 1,500 nga cash gift diin sa 4.5 million naibanan lang og 3.7 million.

Sayo ning buwana, giaprobahan sa konseho ang 6.6 million nga supplemental budget alang sa laing hugna sa cash gift nga ipanghatag sa mga senior citizens gikan sa buwan sa Hunyo hantud Disyembre.

Si City Councilor Vince Rama, chairman sa committee on Senior Citizens nimando nga hatagan sila og lista sa payroll sa kapin 2 mil ka mga senior citizens nga nahatagan sa cash gift ug ila usab nga susihon kung tinuod ba gyod nga nakadawat ang maong mga senior citizens.

Si Rama mihatag og 15 diyas sa pag hatag kanila sa maong lista gikan sa accounting office nga hantud karon wa pa nila madawat.

Susihon usab sa konseho ang ordinansa labot sa maong pagpanghatag og cash gift nga gipasar sa milabayng administrasyon kung diin gikwestyon ang papel sa City Social Welfare and Development office.